Зімовая бяспека: як сагрэцца і не згарэць
З надыходам халадоў рызыка ўзнікнення пажараў значна ўзрастае. Інтэнсіўнае выкарыстанне ацяпляльных прыбораў і грэбаванне мерамі пажарнай бяспекі — у «топе» прычын вогненных надзвычайных здарэнняў. Толькі сёлета на тэрыторыі Гродзенскай вобласці зарэгістравана больш за 80 пажараў, у агні якіх загінулі 13 чалавек. Пазбегнуць трагедыі можна, калі старанна падрыхтавацца да халадоў і строга прытрымлівацца правілаў бяспекі.
Спраўная печ — заклад бяспекі
Яшчэ да пачатку ацяпляльнага сезона трэба было праверыць печ, пры неабходнасці заладзіць расколіны гліняным растворам, замяніць пашкоджаную цэглу. Комін трэба пабяліць ў межах паддашкавага памяшкання – гэта дапаможа своечасова заўважыць дэфекты. Месцы злучэння коміна з драўлянымі канструкцыямі павінны быць абаронены цагляным мурам. Не забудзьцеся перад топкай усталяваць ліст з негаручага матэрыялу, каб абараніць падлогу ад выпадковага выпадання гарачых вуглёў.
Правілы топкі печы: захоўвайце асцярожнасць
Паліце печ 2-3 разы на дзень па 1,5 гадзіны. Працэс топкі спыняйце не менш за 2 гадзіны да сну або выхаду з дому — хай вуглі цалкам прагараць. Не закрывайце засланку да поўнага прагарання вуглёў.
Упэўніцеся, што мэбля, дровы і іншыя прадметы знаходзяцца на бяспечнай адлегласці ад печы. Пасля топкі попел збярыце ў металічную ёмістасць, праліце вадой і толькі пасля гэтага выкідвайце.
Важна: не выкарыстоўвайце лёгкаўзгаральныя вадкасці для падпалкі, не пакідайце печ без нагляду і не давярайце топку дзецям.
Асцярожна, электраправодка!
Не менш важна надаць увагу электраправодцы. З халадамі нагрузка на электрасетку расце — уключаюцца абагравальнікі, лямпы, тэхніка. Старая ці пашкоджаная праводка можа стаць прычынай кароткага замыкання і пажару. Таму праверка стану электраправодкі, разетак і выключальнікаў павінна стаць вашым прыярытэтам.
Самастойна не эксперыментуйце — лепш запрасіць кваліфікаванага электрыка для дыягностыкі і, пры неабходнасці, рамонту, пазбягайце перагрузкі электрасеткі.
Электраабагравальнікі: будзьце ўважлівыя
Не пакідайце электраабагравальнікі ўключанымі на ноч, трымайце іх далей ад мэблі і не сушыце на іх бялізну. Пераканайцеся, што карыстаецеся толькі спраўнымі прыборамі завадской вытворчасці.
Дадатковыя меры: бяспека вышэй за ўсё
Усталюйце ў доме аўтаномныя пажарныя апавяшчальнікі. Гэтыя простыя, але эфектыўныя прыборы могуць выратаваць жыццi.
Памятайце: ваша адказнасць і ўвага — лепшы спосаб прадухіліць бяду!